أرجو من سيادتكم الترحيب بالسيد المسئول الكبير اوى
المذيعة: أهلا بسيادتكم يا فندم نورتنا
المسئول: والله ده نور حضرتك
المذيعة : فيه يا فندم بعض التساؤلات والموضعات الى بتطرح نفسها للنقاش فهل ممكن نستفسر من حضرتك عليها بما ان حضرتك ليك مكانتك فى البلد
المسئول: طبعا طبعا أمال انا جاى هنا ليه
المذيعة : طيب يا فندم أول سؤال وده سؤال بيدور فى بالي انا شخصيا, هل رئيس الجمهورية القادم لمصر هو ابن الرئيس محمد حسنى مبارك
المسئول : والله يا بنتى ديه تعتبر نميمه وانا مش بحب اتدخل فى خصوصيات الناس وانتى عارفة البيوت اسرار حاجة بين أب وابنه احنا نتدخل ليه
المذيعة : عموما يا فندم بلاش السؤال بدل فيه نميمة, ايه راى حضرتك فى الى حصل فى المحلة والشباب التسعة الى عنيهم راحت والله اعلم ايه حصل كمان
المسئول: شوفي يا بنتى الى حصل فى المحلة ده بيحصل فى العالم كله (فلسطين , العراق , السودان....) كل الدول فيها كده وكمان ما هو الشباب دول اثبتو للناس كلها انهم مؤمنين لأن زى مانتى عارفة "المؤمن دايما منصاب"
المذيعة : طيب يا فندم بلاش الموضوع ده ايه راى حضرتك فى العبارة الى غرقت بالحجاج
المسئول: يابنتى ده موضوع قديم اوى بس هقولك الى محدش يعرفو عن موضوع العبارة الراجل صاحب العبارة ده عمل خير كبير اوى
المذيعة : مقاطعة ازاى يعنى يا فندم
المسئول: هقولك الراجل ده حب يدخل الجنه فقال يغرق العبارة فكل الى فيها يموتو شهداء ولسه راجعين من الحج وبكده يبقا كان سبب فى دخول ناس كتيير الجنه فربنا يكافئو ويدخلو الجنه
المذيعة: والله يا فندم هى وجهة نظر بردو (فاصل ونعود)
